ഓ എസ് ഐ മോഡൽ ലെയറുകൾ |OSI Model Layers

കമ്പ്യൂട്ടറുകൾ തമ്മിലൊ. നെറ്റ്‌വർക്കുകൾ തമ്മിലോ ഉള്ള ബന്ധം
സ്ഥാപിക്കുന്നതിനായി ഏഴു തലങ്ങളിലായി (7 Layers) ഉപയോഗിക്കുന്ന
നെറ്റ്‌വർക്കിംഗ് പ്രോട്ടോക്കോളുകളുടെ പ്രാഥമികമായ ചട്ടക്കൂടിനെയാണ്
ഓ എസ് ഐ മോഡൽ ലെയറുകൾ എന്നത് കൊണ്ടുദ്ദേശിക്കുന്നത്. ഓപ്പൺ സിസ്റ്റം
ഇന്റർകണക്ഷൻ (Open System Interconnection) എന്നതിന്റെ ചുരുക്ക രൂപമാണു
ഓഎസ്‌ഐ. 1983 ൽ ഇന്റർനാഷണൽ ഓർഗനൈസേഷൻ ഫോർ സ്റ്റാൻഡേഡൈസേഷൻ ആണ് ഈ
നിലവാരം നെറ്റ്‌വർക്കിംഗിനായി നിശ്ചയിച്ച് നൽകിയത്. ഓ എസ് ഐ മോഡൽ ലെയറിലെ
എഴു ലെയറുകൾ താഴെപ്പറയുന്നവയാണ്.

7.ആപ്ലിക്കേഷൻ
6.പ്രെസന്റേഷൻ
5. സെഷൻ
4.ട്രാൻസ്പോർട്ട്
3. നെറ്റ്‌വർക്ക്
2. ഡാറ്റാ ലിങ്ക്
1. ഫിസിക്കൽ

അപ്പർ ലെയർ എന്നും ലോവർ ലെയർ എന്നും ഈ ലെയറുകളെ വിഭജിച്ചിരിക്കുന്നു.
താഴെ നിന്നും മുകളിലേക്കാണ് ഈ ലെയറുകളുടെ ഘടന ഓ എസ് ഐ മോഡലിൽ
രൂപപ്പെടുത്തിയിരിക്കുന്നത്. ഓരോ ലെയറുകൾക്കും പ്രത്യേകം ചുമതലകൾ
വിഭജീച്ച് നൽകിയിരിക്കുന്നു. ഏറ്റവും മുകളിലെ ലെയറിൽ ആപ്ലിക്കേഷൻ,
പ്രസന്റെഷൻ, സെഷൻ ലെയർ എന്നിവയും താഴെയുള്ള ലെയറിൽ ട്രാൻസ്പ്പോർട്ട് ,
നെറ്റ്‌വർക്ക്, ഡാറ്റാലിങ്ക്, ഫിസിക്കൽ ലിങ്ക് എന്നിവയും
ഉൾപ്പെടുത്തിയിരിക്കുന്നു. മുകളിലെ ലെയറുകളിൽ പ്രധാനമായും നടക്കുന്നത്
ഉപയോക്താവുമായി കൂടുതൽ ബന്ധമുള്ള പ്രവർത്തികളായിരിക്കും. ഉദാഹരണത്തിനു
ഡാറ്റാ ഫോർമാറ്റിംഗ്, കണക്ഷൻ മാനേജ്മെന്റ് മുതലായവയെല്ലാം നടക്കുന്നത്
മുകളിലെ ലെയറുകളിലായിരിക്കും. താഴെയുള്ള ലെയറുകളിൽ നടക്കുന്നത്
നെറ്റ്‌വർക്കിംഗുമായി നേരിട്ടു ബന്ധമുള്ള പ്രവർത്തികളും.റൌട്ടിംഗ്,
അഡ്രസ്സിംഗ്, ഫ്ലോ കൺ‌ട്രോൾ മുതലായവ നടക്കുന്നത് താഴെയുള്ള
ലെയറുകളിലായിരിക്കും.

ആപ്ലിക്കേഷൻ ലെയർ: ഉപയോക്താവിന്റെ പ്രവർത്തികളെല്ലാം നടക്കുന്നത്
ആപ്ലിക്കേഷൻ ലെയറിനുള്ളീൽ വെച്ചായിരിക്കും. ഫയൽ കൈമാറ്റം ചെയ്യുക,
ഇമെയിലുകൾ അയക്കുക മുതലായ പ്രവർത്തിയെല്ലാം നടക്കുന്നത് ഇവിടെ വെച്ചാണ്.
FTP, Telnet, SMTP തുടങ്ങിയ പ്രോട്ടോക്കോളുകൾ പ്രവർത്തിക്കുന്നതു
ആപ്ലിക്കേഷൻ ലെയറിനുള്ളീൽ വെച്ചാണ്.
പ്രസന്റേഷൻ ലെയർ: വിവരങ്ങളെ ഒരു ഏകീകൃത രൂപത്തിലാക്കുകയും അതിനെ
എൻ‌ക്രിപ്റ്റ് ചെയ്യുക തുടങ്ങിയ പ്രവർത്തികളെല്ലാം നടക്കുന്നത്
പ്രസന്റെഷൻ ലെയറിനുള്ളീൽ വെച്ചായിരിക്കും. ആപ്ലിക്കേഷൻ ലെയറിൽ നിന്നും
വിവരങ്ങളെ നെറ്റ്‌വർക്കിലേക്ക് അയക്കുവാനുള്ള ഫോർമാറ്റിലേക്ക്
മാറ്റുന്നതും ഇതിനുള്ളീൽ വെച്ചായിരിക്കും. എൻ‌ക്രിപ്ഷനിംഗ്, ഡാറ്റാ
കമ്പ്രഷൻ തുടങ്ങിയവെയെല്ലാം പ്രസന്റേഷൻ ലെയറിന്റെ ചുമതലകളിൽ പെടുന്നു.
സെഷൻ ലെയർ: ഒരു നെറ്റ്‌വർക്കിലെ വിവിധഭാഗങ്ങളിലായി കണക്റ്റ്
ചെയ്തിരിക്കുന്ന ഉപയോക്താക്കളുടെ സിസ്റ്റങ്ങൾ തമ്മിൽ ഒരു ബന്ധം
സ്ഥാപിച്ചെടുക്കുക എന്നതാണു സെഷൻ ലെയറിന്റെ ദൌത്യം. ഓരൊ പോയിന്റിലുമുള്ള
കണക്ഷനുകളെ ഏകോപിപ്പിക്കുക. പ്രവർത്തികൾ ലോഗ് ചെയ്യുക മുതലായവയെല്ലാം
സെഷൻ ലെയറിൽ വെച്ചാണു നടക്കുന്നതു. നെറ്റ്ബയോസ് സെഷൻ ലെയറിൽ
പ്രവർത്തിക്കുന്ന പ്രോട്ടോക്കോളിൽ പെട്ട ഒന്നാണ്
ട്രാൻസ്പോർട്ട് ലെയർ: നെറ്റ്‌വർക്കിലെ രണ്ട് എന്റ് പോയിന്റുകൾ തമ്മിലുള്ള
വിവരങ്ങളുടെ സുഗമമായ ഒഴുക്ക് കൈകാര്യം ചെയ്യുന്ന ലെയറാണു ട്രാൻസ്പോർട്ട്
ലെയറുകൾ. ഡാറ്റയുടെ എറർ ചെക്കിംഗ് ട്രാൻസ്പോർട്ട് ലെയറിനുള്ളീൽ വെച്ച്
നടക്കുന്നതിനാൽ അയച്ച ഫയൽ തന്നെയാണു ലഭിച്ചതെന്ന് ഇതു വഴി ഉറപ്പ്
വരുത്താൻ സാധിക്കുന്നു. മാത്രമല്ല ഫയൽ ലഭിച്ച വിവരം അയച്ച കമ്പ്യൂട്ടറിനെ
അറിയിക്കുക എന്ന ചുമതല കൂടി ട്രാൻസ്പോർട്ട് ലെയറിനുണ്ട്. ട്രാൻസ്മിഷൻ
കൺ‌ട്രോൾ പ്രോട്ടോക്കോൾ ( റ്റി സി പി) പ്രവർത്തിക്കുന്നതു ഈ ലെയറിലാണ്
നെറ്റ് വർക്ക് ലെയർ: നെറ്റ് വർക്കിലൂടെ എന്തു മാത്രം വിവരങ്ങൾ കൈമാറ്റം
ചെയ്തുവെന്ന് കണക്കാക്കുന്നത് നെറ്റ്‌വർക്ക് ലെയറിനുള്ളീൽ വെച്ചാണ്.
കമ്പ്യൂട്ടറിന്റെ ലോജിക്കൽ അഡ്രസിനെ ഫിസിക്കൽ അഡ്രസാക്കി മാറ്റുന്നതും
ഇവിടെ വെച്ചായിരിക്കും. ( ഉദാഹരണത്തിനു കമ്പ്യൂട്ടറിന്റെ പേര്, മാക്
(MAC) അഡ്രസിലേക്ക് മാറ്റുക). നെറ്റ്‌വർക്കിലുണ്ടാകുന്ന
പ്രശനങ്ങൾക്കുത്തരവാദി നെറ്റ്‌വർക്ക് ലെയറായിരിക്കും. റൌട്ടറുകൾ
പ്രവർത്തിക്കുന്നത് നെറ്റ്‌വർക്ക് ലെയറിനുള്ളീൽ വെച്ചാണ്. പാക്കറ്റുകളെ
ഐപി അഡ്രസുകൾക്കനുസരിച്ച് റൌട്ട് ചെയ്യുന്നതു നെറ്റ്‌വർക്ക്
ലെയറായിരിക്കും. ഇന്റർനെറ്റ് പ്രോട്ടോക്കോൾ( ഐ പി ), ഇന്റർനെറ്റ്
കൺ‌ട്രോൾ മെസ്സേജ് പ്രോട്ടോക്കോൾ ( ICMP) തുടങ്ങിയ പ്രോട്ടോക്കോളുകൾ
പ്രവർത്തിക്കുന്നതും ഈ ലെയറിനുള്ളീലാണ്.
ഡാറ്റാ ലിങ്ക്: ഡാറ്റാ ലിങ്ക് ലെയറിനുള്ളീൽ വെച്ചാണു പാക്കറ്റുകളെ
കോഡിംഗ് ചെയ്യുന്നത്. അടുത്തുള്ള രണ്ട് നെറ്റ്‌വർക് നോഡുകൾ തമ്മിലുള്ള
ബന്ധം സാധ്യമാക്കുന്നത് ഡാറ്റാ ലിങ്ക് ലെയറായിരിക്കും. സ്വിച്ചുകളും
ഹബുകളും പ്രവർത്തിക്കുന്നത് ഈ ലെയറിലായീരിക്കും . മീഡീയ അക്സസ് കൺ‌ട്രോൾ
എന്നും (MAC), ലോജിക്കൽ ലിങ്ക് കൺ‌ട്രോൾ എന്നും ഡാറ്റാ ലിങ്ക് ലെയറിനെ
വീണ്ടും രണ്ടായി തിരിച്ചീരിക്കുന്നു. അഡ്രസിംഗിനായിട്ടാണു പ്രധാനമായും
മാക് അഡ്രസുകൾ ഉപയോഗിക്കുനത്. നെറ്റ്‌വർക്കിലൂടേയുള്ള വിവരങ്ങൾ കൃത്യമായി
തന്നെ എത്തുന്നതിനു മാക് സഹായിക്കുന്നു. ഫ്രയിമുകളെ സിംക്രണൈസ്
ചെയ്യുന്നതിനും, നെറ്റ്‌വർക്കിലെ പ്രശ്നങ്ങൾ പരിശോധിക്കുന്നതിനുമാണ്
ലോജിക്കൽ ലിങ്ക് കൺ‌ട്രോൾ ഉപയോഗിക്കുന്നത്.
ഫിസിക്കൽ: നെറ്റ് വർക്കിനായുപയോഗിക്കുന്ന ഉപകരണങ്ങളെയാണു ഫിസിക്കൽ ലെയർ
എന്നതു കൊണ്ടുദ്ദേശിക്കുന്നത്. സ്വിച്ചുകളും ബ്രീഡ്ജുകളുമെല്ലാം
ഇതിനുദാഹരണങ്ങളാണ്